- Gida didaktikoa -

Proiektuaren Canvas-a

CEDEC. ARTEmaticaMENTE canvas-a (CC BY-SA)

EDIA proiektua Lehen Hezkuntzako 4.mailako ikasleei zuzenduta dago. Lehen hezkuntzako 3.zikloan ere erabil daiteke. Diziplina anitzekoa denez, ikasketa-eremu bat baino gehiago hartzen ditu barnean.

"ARTEmatikaMENTE" sekuentzia didaktikoaren edukiek Lehen Hezkuntzako Matematika, Arte Hezkuntza, Gizarte Zientziak eta Hizkuntza arloetako curriculuma garatzen dute baita Bloom hezkuntza-helburuak ere –Bloom-en taxonomia izenaz ezagunak–, aro digitalera egokituta. Ikus bideoa.

Plangintza didaktikoa

HEZKUNTZA-HELBURUA

Sekuentzia didaktiko horrek lotzen ditu arte-hezkuntza eta geometriaren ikaskuntza. Proposamena hau da: ingurunea eta hainbat arte-lan aztertuta, modu esperimentalean kontzeptu geometrikoak ulertzea eta gogoeta egitea, eta, azkenik, norberaren arte-konposizioak sortzea.

Geometriaren printzipioen adibideak aurkitzen ditugu kubismoan eta katedraletan, hondar-dunetan eta itsas izarretan. Naturaren munduak eta gizakiek sortutako munduak simetria, topologia, puntuak, lerroak, planoak, kurbak, solidoak eta, jakina, dimentsio eta printzipio matematikoak islatzen dituzte. Bietan zirkuluak, konoak, hexagonoak, laukizuzenak, esferak, triangeluak, kuboak, zilindroak, piramideak eta prismak daude.

Arkitektoek, mekanikariek, diseinatzaileek, ingeniariek, eraikitzaileek, pilotuek, nabigatzaileek, artista plastikoek... guztiek erabiltzen dute geometria beren lanetan. Geometriaren garrantzia dela eta, asko aplikatzen da eskola-curriculum osoan.

Cedec. Claves para la planificación (CC BY-SA)

Artean, naturan eta ingurunean aurkitzen diren forma geometrikoen behaketa abiapuntutzat hartuta, ikerketa matematikako eta sorkuntza artistikoko lan bat planteatzen zaie ikasleei. Proiektua amaitzeko, erakusketa artistiko bat antolatzen da eta erakusketari buruzko ikus-entzunezko erreportaje bat egiten da.

Hezkuntza-baliabide ireki horren diseinuan, konpetentzia digitalaren bi maila hartu dira kontuan: irakasleena eta ikasleena.

Proposatutako zeregin guztiak tresna eta baliabide digitalak edo bestelakoak erabiliz gauzatu daitezke (ikasgelako koadernoa, horma-irudiak...). Tresna digitalen erabilera-maila ikasgelako errealitatera egokitu behar da, bai ikasleen eta irakasleen erabilera- eta trebetasun-mailei dagokienez, bai baliabide materialen eta teknikoen hornidurari dagokionez.

Jarraian, sekuentzia didaktikoaren egiturari eta atazei buruzko informazio guztia agertzen da.

Feedbacka

AZKEN PRODUKTUA

Ikasleen arte- eta matematika-lanen erakusketa "ARTEmatikoen galeria".

Erakusketa artistikoari buruzko ikus-entzunezko erreportajea egitea.

ZABALKUNDEA-KOMUNIKAZIOA

Ikasgelako lanaren zabalkundea hainbat unetan egitea proposatzen da, sekuentzia didaktikoan zehar. Tresna bat baino gehiago erabil daiteke baliabidearen zabalkunde horretarako.

Blog batean sarrerak egitea: bai ikasgelako blogean, bai proiekturako berariaz sor daitekeen beste batean. Ikasgelako bloga erabiltzen bada, proiektuak iraun bitartean sarrera bat baino gehiago egitea gomendatzen dugu. Talde bakoitza sarrera bat edo batzuk egiteaz arduratu daiteke, edo, bestela, talde guztiek beren sarrerak idatz ditzakete gai berari buruz.Lan hori ebaluatzeko errubrika bat (formatu editagarrian, odt-an, eta pdf-n) erabil daiteke. Blogeko artikulu posibleen artean, hauek iradokitzen ditugu:
- Egindako diapositiben aurkezpenak igotzea, bai hirian zeharreko ibilbidean hartutako argazkiekin egindakoak, bai "Hau artea da!" atalean hautatutako koadroekin diseinatutakoa.
- Sekuentzian zehar egindako obrez osatutako sarrera, bakoitzaren iruzkin pertsonalarekin. Beste batzuetan, galdera bat gehitu ahal izango da, bisitariek "iruzkinak" atalean erantzun dezaten. Era berean, irekita egongo da lanei buruzko iritziak jasotzeko, bai ikastetxeko ikasleen aldetik, bai blogean sartzen den edozein pertsonaren aldetik.
- Museoko bisitari buruzko erreportajea.
- Unitatearen amaieran blog-sarrera bat proposatzen da, non bilduko baitira egindako lan guztiak eta esteka bat, erakusketari buruzko ikus-entzunezko erreportajera eramango duena.

EGITURA

Hasierako zereginak

Hasierako atazetan artea eta geometria bilatzeko behaketak egingo dira ingurunean. Ataza horietan, geometrian oinarritutako sorkuntzak bilatu, analizatu eta egingo dira.

“ARTEmatikaMENTE”

Hasierako testua. Ingurunea ikuspegi matematikoekin behatzeko erronka planteatzen da: matematika —eta, jakina, artea— gure bizitzetan oso presente dagoela kontzientziatzea. Era berean, ataza aurkezten da: konposizio artistikoak egitea ezagutza geometrikoak erabiliz.

Elkarrekin apartak izan gaitezke! Sekuentzia gauzatzeko talde-lana planteatzea.

“Geometria gure ingurunean”

Hasierako testua. Bideo baten bidez, gure inguruko geometria behatzen hasiko dira.
"Irudiak ikertzen". Ibilbide matematiko bat egiteko proposamena, aurkitutako irudi geometrikoak plano batean kokatuz, ondoren analizatzeko.
Lan egiteko antolatuko gara. Google Driven eta blogean taldeko karpeta digital bat egiteko azalpena.
"Bi minutu pentsatzeko ": lehen hausnarketa egin beharreko zereginari, lortu beharreko produktuari eta horri buruzko itxaropenen azterketari buruz.

Garapen-zereginak

Atal bakoitzean, ikasleek teselak ikertu eta egingo dituzte irudi estatikoekin eta biraketekin, artelanak aztertuko dituzte eta artelanak egingo dituzte.

“Tesela atera zaigu!”

“Hasierako testua”. Baldosadura geometrikoen aurkezpena.
"Mosaikoak Google Driven". Mosaikoak lau irudi geometriko desberdinekin egiteko proposamena. Irudiek mosaiko bat osatzeko bete behar dituzten baldintzei buruz hausnartuko da.
"Bost x bost". Paper jarraituko edo DIN A3ko baldosadura bat egitea, ezarritako baldintzak betez.
“Bi minutu pentsatzeko”: Nola ikasten duten hausnartzea. Kasu honetan, taldean egindako lanaren gainean. Hausnarketen egunkarian sarrera bat egingo dute beren ondorioekin.

“Konposizio artistikoak”

“Hasierako testua”. Artisau-mosaikoen aurkezpena.

“Ba al zenekien?” Arte arabiarrean sakontzeko aukera.

"Fish Tessalation". Teselazioak eta horien efektuak aztertzea.

“Tximeletaren hegada”. Teseletan biraketak aztertzea eta birsortzea, 60º-ko eta 120º-ko biraketak erabiliz.

“Bi minutu pentsatzeko”: atal honetan egindako atazei buruzko gogoetak.

"Hau artea da!”

“Hasierako testua”. Pinterest-eko taula baten aurkezpena, artista handien lanekin.

“ARTEtzen”. Aurreko obrak aztertzea.

"Koadro bat birsortzen". Obretako baten birsorkuntza pertsonala. Txantiloi bat ematen da artelan baten analisia errazteko.

“Bi minutu pentsatzeko”: Lan artistiko batek sor ditzakeen emozioei, sentsazioei... buruzko hausnarketa.

Amaierako zereginak

ARTEmatika erakusketa prestatzea eta ikus-entzunezko erreportajea egitea.

“ARTEmatikoen galeria”

“Hasierako testua”. Azken atazak laburbiltzea eta aurkeztea.

"Expoarte". Museo bat in situ edo birtualki bisitatzeko proposamena, haren funtzionamendua eta antolaketa ezagutzeko. ARTEmatika galeria prestatzeko ikasgelan banatu beharreko zereginak azaltzea.
“Artea eta ekintza”. Erakusketa artematikoari buruzko ikus-entzunezko erreportajea egiteko jarraibideak eta urratsak.

“Bi minutu pentsatzeko”: Azken gogoeta.

Curriculumaren plangintza

HELBURUAK

Gizarte- eta kultura-jardueretan ahoz eta idatziz behar bezala ulertzea eta adieraztea.

Hizkuntza erabiltzea gizarte- eta kultura-jardueretan erlazionatzeko eta behar bezala hitz egiteko, errespetuzko eta lankidetzazko jarrera hartuz, norberaren sentimendu eta ideiez jabetzeko eta norberaren jokabidea kontrolatzeko.

Hizkuntza eraginkortasunez erabiltzea eskola-jardueran, bai informazioa bilatzeko, biltzeko eta prozesatzeko, bai esparru akademikoko testuak idazteko.

Ezagutza matematikoa erabiltzea eguneroko bizitzako gertaerei eta egoerei buruzko informazioak eta mezuak ulertzeko, baloratzeko eta ekoizteko, eta matematikak ezagutzaren beste arlo batzuetarako duen izaera instrumentala aitortzea.

Askotariko egoerei aurre egiteko, norberaren trebetasun matematikoak ezagutzea, baloratzea eta horietan segurtasuna eskuratzea, alderdi sortzaile, estetiko edo erabilgarriez gozatzeko eta erabiltzeko aukeretan konfiantza izateko moduan.

Espazio-orientazioko prozedurak erabiltzea problemen ebazpeneko testuinguruetan.

Natura- eta kultura-inguruneko forma geometrikoak identifikatzea, eta elementu eta propietateen ezagutza erabiltzea errealitatea deskribatzeko eta ekintza-aukera berriak garatzeko.

Talde-jardueretan parte hartzea, jokabide arduratsua, eraikitzailea eta solidarioa hartuz, eta funtzionamendu demokratikoaren oinarrizko printzipioak errespetatuz.

Informazioaren eta komunikazioaren teknologiak erabiltzea informazioa lortzeko eta ezagutzak ikasteko eta partekatzeko tresna gisa, eta pertsona guztien bizi-baldintzak hobetzeko egiten duten ekarpena baloratzea.

Ezagutza artistikoak aplikatzea eguneroko errealitateko eta artearen eta kulturaren munduko egoeren eta objektuen behaketan eta azterketan, horiek hobeto ezagutzeko eta norberaren gustua eratzeko.

Arte ekoizpenak egitea, lankidetzan eta banaka, hainbat funtzio norbereganatuz eta azaltzen diren arazoak konpontzen lagunduz, azken produktua egokia izan dadin.

Artista batzuen lana ezagutzea eta horretan interesatzea, baita haien obrekin gozatzea ere.

EDUKIAK

Ahozko eta idatzizko testuak ulertzea eta sortzea ikasteko eta informazioa jasotzeko, bai helburu didaktikoarekin sortutakoak, bai eguneroko erabilerakoak (jarraibideak, azalpenak, deskribapenak …), bai informalak (berdinen arteko eta lantaldeko elkarrizketak) bai formalizazio-maila handiagokoak (gelako azalpenak).

Komunikazio-trukerako estrategiak eta arauak: parte-hartzea; azalpen argia; diskurtsoa antolatzea; entzutea; hitz egiteko txanda errespetatzea; moderatzailearen eginkizuna; intonazio egokia, besteen sentimenduak, esperientziak, ideiak, iritziak eta ezagutzak errespetatzea. Inkesta eta elkarrizketetan parte hartzea. Ahozko iruzkina eta iritzi pertsonala.

Testuak sortzeko arauak eta estrategiak: plangintza, berrikuspena eta hobekuntza.

Elementu grafikoak eta paratestualak erabiltzea ulermena errazteko (ilustrazioak, grafikoak eta tipografia).

Espazioaren geometria: posizioak eta mugimenduak.

Eguneroko bizitzan irudi lauak eta espazialak identifikatzea.

Poligonoen sailkapena.

Geometriari buruzko oinarrizko hiztegia zuzen erabiltzea.

Informatika-baliabideak erabiltzea forma lauak eta espazialak manipulatzeko, ulertzeko, deskribatzeko, sortzeko eta eraldatzeko.

Irudi geometriko lauak eraikitzea, datuetan oinarrituta eta hainbat material erabilita. Oinarrizko forma geometrikoak aztertzea.

Irudi geometrikoak alderatzea eta sailkatzea, hainbat irizpide erabilita.

Irudiak sortzea, beste batzuetatik abiatuta, irudi konplexuagoen konposizioaren eta deskonposizioaren arabera.

Erregulartasunak, simetriak, biraketak eta translazioak.

Problema geometriko errazak ebaztea, jarraitutako prozesua argituz eta emaitzak azalduz.

Norberaren aukerekiko konfiantza izatea konposizio artematikoetan geometria erabiltzean.

Lankidetzarako eta errespeturako jarrera izatea partekatutako ikaskuntza-egoeretan.

Taldearen kohesioa eta lan kooperatiboa sustatzeko estrategiak erabiltzea.

Zereginak planifikatzea eta kudeatzea, helburuak lortzeko.

Informazioaren eta komunikazioaren teknologiak erabiltzea informazioa bilatzeko eta hautatzeko, prozesuak simulatzeko eta ondorioak aurkezteko.

Arte-adierazpenei buruzko bilketa inprimatua eta digitala egitea.

Artista plastikoei buruzko informazioa bilatzeko eta haien ekoizpenak komentatzeko interesa piztea.

Elementu geometrikoak erabiliz irudikatzeko aukerekin esperimentatzea, haien formekin, dimentsioekin, biraketekin... jolastuz.

Formen, koloreen, posizioen eta abarren aukerak eta horiek euskarri desberdinetan izan ditzaketen konposizioak aztertzea.

Helburu artistikoak dituzten atazak banaka edo taldeka egitea.

Taldeak ezartzen dituen arauak eta ataza-banaketa errespetatzea.

Norberaren ekoizpenetan, beste artista batzuengan behatutako alderdiak aplikatzea.

Ikaskuntza ingurunea

Hezkuntza-helburuen taxonomia - Bloom-en taxonomia

Ikaste-prozesuan, proposatutako zereginek ezinbestean barne hartu behar dituzte maila kognitibo guztietako gaitasun eta ezagutzak: oinarrizkoenetatik hasita (ezagutzea, ulertzea eta aplikatzea), trebetasun konplexu eta sakonenetara bitarte (aztertzea, ebaluatzea eta sortzea). Bloom-en taxonomia da erreferentzia.

Lankidetzako ikaskuntza

Planteamendu pedagogikoak, helburuen taxonomia kontuan hartzeaz gain, ikaskuntza kooperatiboan jartzen du arreta (Jonhson&Johnson, Pujolàs).

Hori dela eta, garrantzitsua da zereginak garatzeko orduan lankidetza faktore beharrezkoa izatea; izan ere, proiektua helburu komun gisa hartu behar da, taldea eta lantaldeak batzen dituena, eta kontuan hartu behar da guztien lanari esker beteko dugula helburua. Jarraian ageri den irudiak agerian uzten ditu elkarlanean aritzeko behar diren 4 baldintzak. Dokumentu honetan, ikasleekin erabiltzeko ikaskuntza kooperatiboaren osagaiak jorratu daitezke (formatu editagarrian, odp-n, eta pdf-n)

Cedec. Aprenden cooperando (CC BY-SA)

Ikaskuntza-testuinguru honen sorrerak harreman zuzena dauka ikasgelako taldekatzeekin eta baliabide jakin batzuen erabilerarekin.

Jarraian eskaintzen dira ikasleak taldekatzeko proposamen metodologiko bat, kontsultarako baliabideak eta material erabilgarria.

Feedbacka

TALDEKATZEAK

Ikaskuntza kooperatiboa posible izateko, ezinbestekoa da proiektuaren hasieran irakasleak plangintza egokia egitea eta aurretiko erabaki hauek hartzea:

Talde heterogeneoak sortzea (lauzpabost kide).
Taldea kudeatzeko kontsignak ezartzea.
Banakako zein taldeko lana ebaluatzea.

Era desberdinetako materialek lagunduko diote irakasleari taldeen lana kudeatzen:

Talde kooperatiboetarako oinarrizko gida (formatu editagarrian, odt, eta pdf-n).
Google-apps (DRIVE - SITE - BLOG)
Talde-ebaluaziorako taula (formatu editagarrian, odt, eta pdf-n)

Eskuratutako ezagutzari buruzko gogoeta sustatzeko, zeregin gehienen ondoren «Bi minutu pentsatzeko» izeneko jarduera proposatzen da. Ariketaren helburua da ikasleak aztertzea nola ikasten duen eta nola aritzen den elkarreraginean ikaskideekin.

TALDEEN KOHESIOA

Taldekatzeen antolamendu-alderdiez gain, beharrezkoa da gela/talde osoaren zein lantalde txikien «talde-kohesioa» abiatu eta sendotzeko tarte bat hartzea. Taldeen lehenengo egunak dinamizatzeko hainbat ideia aurkezten dira jarraian:

Ikasleen eskuen silueta marraztea eta moztea, eta izenak eta ezaugarri pertsonal bat idaztea.

Silueta guztiekin irudi bat osatzea (jakin bat edo abstraktu bat).

Irakaslearen laguntzaz, ikasleen ikaskuntza-estiloak, adimen indartsuenak eta adimen ahulenak identifikatzea. Horretarako, galdetegi pertsonal bat egin dezakete, Adimen Anizkoitzen (IIMM test-a) teoriari jarraituz. Ondoren, emaitzak komentatu eta horma-irudi bat egingo dute, ikasgelan jartzeko.

Talde-lanari lotutako jardunbide egoki eta desegokiak biltzen dituzten testu grafikoak «Role-playing» teknikaren bitartez dramatizatzea.

Taldean lan egiteko prozedura-arauak elkarrekin planifikatzea.

Oinarrizko taldeak sortzea. Talde horiei eutsiko zaie sekuentzia didaktikoan, hiruhilekoan edo ikasturtean.

Ardurak definitu eta banatzea.

Portfolio bat sortzea, non taldearen eta kide bakoitzaren helburuak definituko diren (portfolio bat ikasleko). Portfolioak barne hartu beharko ditu «Gogoeten Egunkaria», ikasten ikasi gaitasuna, ikaskuntza-prozesuaren erregistroa, gaitasun bakoitzaren garapenaren ebidentzia, eta helburu pertsonalen eta talde-helburuen planteamendua.

Ikasgela-taldeari izen bat jartzea. Talde bakoitzari izena jarri eta logoa egitea.

TRESNA DIGITALAK: IKASGELAKO BLOG-a

Gelako bloga erabiltzea proposatzen dugu, izan ere, haren bitartez:

Talde-kohesioa sustatuko da: taldekideek Sarean euren identitatea izango den blogaren izena eta diseinua erabakiko dute. Izena adierazgarria izango da haientzat, gela edo maila jakin bateko taldea diren neurrian.

Unitateko ekoizpen-lanak argitaratzeko euskarria eskainiko digu: proiektuari buruzko bideoak, aurkezpenak eta sarrerak.

Ikasgelako lanari ikusgaitasuna emango dio, ikasgelako ateak hurbileko komunitatera zabalduko baitira, baita haratago ere.

Taldetik kanpoko pertsonekin elkarreraginean aritzeko aukera ematen du, blog-eko iruzkinen bitartez. Netetiketari lotutako alderdiak jarriko dituzte praktikan.

Sareko identitatea ulertzen lagunduko du. Talde-identitatea (digitala) kanpora ezagutaraziz, gerora beren identitate digital propioaren gaineko erabaki egokiak hartzeko gai izango dira.

Analogikoaz gain, euskarri digitalen erabilera sustatuko du.

Blog hezigarrien erabileren eredu bat: Blogmaníacos, Lehen Hezkuntzako bigarren zikloa.

Bestelako tresna digitalak ere erabiltzeko aukera dago. Gaitasun digitala garatzeko, uste dugu ezinbestekoa dela pixkanaka erabiltzen ikastea dokumentu partekatuak, testu-editoreak, grabagailuak, bideo-editoreak, multimedia aurkezpenak, web-nabigazioa, etab. Elkarlanerako web-tresnak oso erabilgarriak dira irakasleek lantaldeak kudeatzeko, baita talde bakoitzaren barne-kudeaketarako ere.

Azkenik, Google-en dokumentu partekatuak ere erabil daitezke dokumentuak deskargatzeko, editatzeko eta partekatzeko. Uste dugu mota horretako aplikazioak pixkanaka txertatu behar direla, oso erabilgarriak baitira taldeen lan kooperatiboa eta ikasle guztien arteko lankidetza bultzatzeko.

Horregatik, zereginetan tresna horiei ematen zaie lehentasuna, baliabide tradizionalenak bigarren maila batean utzita. Hala eta guztiz ere, irakasle bakoitzak erabakiko du zer neurritan egokitu daitekeen lan-eremu digitalera. Baliabide tekniko edo azpiegitura nahikorik ez dagoenerako, zeregin guztietan «arkatz eta paperezko» aukera edo alternatiba «ofimatikoa» aurkezten da.

Ebaluazioa

EBALUAZIO TEKNIKAK ETA EBALUAZIORAKO TRESNAK

Ebaluazio-adierazleak dira sekuentzia didaktiko hau ebaluatzeko erreferenteak. Ikasleek menperatu beharreko ekintzak deskribatzen dizkigute. Gaitasunak eskuratzeko aurrerabidea ere ezartzen dute; izan ere, gaitasunen garapenean pentsatuz formulatzen dira adierazleak. Prozesua da oinarria, ez jakintzaz jabetu izana.

Prozesuaren eta produktuaren balorazioa egitea jasotzen da planteatzen den ebaluazioan, baita norberaren ikaskuntzari buruzko hausnarketa egitea ere. Horretarako, ezinbestekoa da zenbait teknika erabiltzea, hala nola behaketa zuzena, eztabaidak, elkarrizketak, dokumentazioa eta idatzizko edo ahozko proba objektiboak.

Brad Flickinger. student_ipad_school - 038(CC BY)

Irakasleei dagokie unitatean zehar bildutako datu objektiboak kontuan hartuta kalifikatzea eta erabakiak hartzea. Jarraian, ebaluaziorako orientabideak eta tresnak aurkezten dira.

HEZKUNTZAKO PORTFOLIOA

Ikasketa-prozesuaren gidari izan behar dute ikasleek. Hori lortzeko, hezkuntza portfolio pertsonala erabiltzeko proposamena luzatzen dugu. Bertan gordeko dira proiektuari, ikasturteari... dagozkion ikasketa-helburu pertsonalak. Gainera, ikaslearen ikasketa-ebidentziak ere jasoko dira hor: bereziki harro sentiarazi duten lanak, zirriborroak... Gogoeta metakognitiboak («Bi minutu pentsatzeko») ere jaso daitezke; izan ere, «Ikasten ikasi» gaitasuna garatzen lagunduko diote.

Komenigarria da portfolio digitalak erabiltzea. Txantiloi hau erabil daiteke horretarako. Dena den, beste formatu bat ere erabil daiteke: karpeta bat ordenagailuan edo disko gogor birtual batean, karpeta analogiko bat...

NORK EBALUATUKO DU?

Proposamen didaktikoaren arabera, irakasleek eta ikasleek parte hartuko dute ebaluazioan.

Irakasleak: heteroebaluazioa eta autoebaluazioa. Esteka honetan, «Irakaslearen autoebaluazioa» egiteko txantiloi bat eskaintzen da, plangintzaz, garapenaz eta ikasleek ikasitakoaz gogoeta egitea errazteko. Kontrol-orria hiru momentutan egitea komeni da: sekuentziaren plangintza egiterakoan, sekuentziaren garapena aztertzerakoan, eta ebaluazio-unean. Ikasleek beren gogoetak jasotzeko taula bat ere erantsita dago.

Ikasleak: elkarren ebaluazioa eta autoebaluazioa.

Honako hauek dira ebaluazio-tresnak (irakasleenak zein ikasleenak):

Talde bakoitzeko kideen arteko elkarreragina behatzea.

Gogoeten egunkaria («Bi minutu pentsatzeko»). Zeregin edo zeregin multzo bat bukatutakoan ikasleen gogoetak biltzen dira, baita taldekideekin partekatzen eta kontrastatzen ere. Banakako tutoretzetan ikasleak tutorearekin partekatuko du informazioa.

Unitatean jasotako txantiloi bakoitzean, norbanakoaren zein taldeen ikaskuntza-prozesuari buruzko datuak eskaintzen dira.

Taldeei irakurriko zaie informazioa eta feedback trukea egingo da, gutxienez, astean behin, baita beharrezkoa den guztietan ere.

- "ARTEtzen" Artelan bat interpretatzeko txantiloia.

- "Arte eta ekintza" Azken produktuaren errubrika.

Blog batean sarrerak egiteko errubrika (formatu editagarrian, odt-an, eta pdf-n)

EBALUAZIO-ADIERAZLEAK

Jarraian kontsultagarri daude sekuentzia didaktiko honi dagozkion lorpen-adierazleak.

Feedbacka

LORPEN ADIERAZLEAK

Ezagutzak eta iritziak koherentziaz komunikatzen ditu, lexiko, hizkuntza-formula, intonazio eta ahoskera egokiak erabiliz.
Formatu digitalean zein paperean, pertsonen arteko harremanei dagozkien testuak idazten ditu (elkarrizketak, azalpenak, argudioak…), eta diskurtsoa antolatzen eta planifikatzen du, komunikazio-egoerara eta -premiara egokituz, hizkuntza-baliabide egokiak erabiliz eta alderdi formalak zainduz.
Gizarte- eta komunikazio-arauak aplikatzen ditu: aktiboki entzuten du, txandei itxaroten die, besteen ideien edo sentimenduen aurrean errespetuz parte hartzen du, solaskidearen esku-hartzeari eta adeitasun-arau batzuei egokitzen zaie.
Bere ingurune soziokulturaleko egoerak eta elementu geometrikoak identifikatu, ulertu, sailkatu eta deskribatzen ditu.
Konposizioak interpretatu eta egiten ditu, oinarrizko nozio geometrikoak erabiliz (kokapena, mugimendua, simetria …).
Konposizioa eta deskonposizioa erabiltzen ditu irudi geometriko berriak sortzeko.
Problema geometrikoak ebazten ditu, estrategia heuristikoak eta arrazoiketakoak erabiliz (sailkapena, erlazioak ezagutzea …), aieruak sortuz, irudiak eraikiz, argudiatuz eta erabakiak hartuz, eta horien ondorioak eta erabiltzearen komenigarritasuna baloratuz.
Informazio garrantzitsua bilatzen, hautatzen eta antolatzen du, aztertu egiten du, ondorioak ateratzen ditu, jarraitutako prozesuari buruzko gogoeta egiten du eta ahoz eta idatziz komunikatzen du.
Lanak ordenatuta eta modu argian eta txukunean aurkezten ditu, paperean eta euskarri digitalean.
Talde-lana planifikatzen du, taldeak koordinatzen ditu, erabakiak hartzen ditu eta erantzukizunak onartzen ditu.
Egindako lanari buruz hausnartzen du, nola lan egiten den ondorioztatzen du eta ikasten jarraitzeko estrategiak lantzen ditu.
Norbere buruarenganako konfiantza-jarrerak erakusten ditu, sen kritikoa, ekimen pertsonala, jakinmina, interesa, sormena ikaskuntzan eta espiritu ekintzailea, inguruko zirkunstantzien aurrean aktibo bihurtuz.
Ingurunean dauden elementuen ezaugarriak eta artelanek eragiten dituzten sentsazioak deskribatzen ditu.
Baliabide analogikoak eta digitalak erabiltzen ditu bi dimentsioko konposizioak sortzeko, non espazioa antolatzen baitu konposizioaren, orekaren eta proportzioaren oinarrizko kontzeptuak kontuan hartuta.
Artista batzuen lanaren ezaugarriak ezagutzen ditu, haien lanaz gozatzen du eta behatutako zenbait alderdi aplikatzen ditu bere sorkuntzetan.
Lortu nahi den produktu artistikorako egokiak diren tresnak, teknikak eta materialak erabiltzen ditu.

Denbora-banaketa

Proposamen didaktiko hau hemeretzi eskola-saiotan garatzeko pentsatua dago. Matematika, Hizkuntza, Plastika eta Gizarte-zientzia arloko saioak.

Reloj

Helen Penjam. WP_20130903_002(CC BY)

Jakina, denbora-banaketa hau gutxi gorabeherako orientabidea da. Proiektuaren sakontasunak, ikasleen beharrizanek eta garapenean arlo ezberdinak integratzeko moduak baldintzatuko dute denbora-banaketa.

Feedbacka

1.saioa:

"ARTEmatikaMENTE": Planteatu diguten erronka ezagutzea, motibatzea, hitz egitea, partekatzea, galderak egitea, zalantzak argitzea...

Arazoa ebazteko taldeak nola antolatu erabakitzea (talde bakoitzeko kideak elkartzea, bakoitzaren ardurak zehaztea eta taldearen koadernoa sortzea).

Ideia-jasa: Zer dakigu gaiari buruz? Zer jakin behar dugu zeregina betetzeko? Nork lagun diezaguke? Banaka galderei erantzutea, taldekideen erantzunak biltzea, bozeramaileak aurkeztea, ideiak panel edo horma-irudi batean sailkatzea.

Drive-en taldearen karpeta sortzea ikasgelako kontuarekin (heldu batek kudeatuta). Konexiorik gabe lan egingo bada, karpetak ordenagailuan bertan sortuko dira.

Hasieran proposatutako produktua azaltzea, errubriketan jasotako adierazleak ezagutaraztea eta ebaluatzeko modua aztertzea.

2., 3. eta 4. saioak:

"Geometria gure ingurunean".

5., 6. eta 7. saioak:

"Tesela atera zaigu!".

8., 9. eta 10. saioak:

"Konposizio artistikoak".

11.,12., 13. eta 14. saioak:

"Hau artea da".

15., 16., 17.,18ª. eta 19. saioak:

"ARTEmatikoen galeria".

Material osagarria

Egitura kooperatiboak

"9 ideas clave. El aprendizaje cooperativo. Pere Pujolàs. Liburuaren laburpena da hau; material horren egileek egin dute. Taldeen kudeaketari, rolei, teknikei eta abarri buruzko informazioa eskaintzen digu.
Erreferentziazko egileetako batzuk dira:
- Johnson & Johnson ("La evaluación en el aprendizaje cooperativo", SM argitaletxea, 2014)
- Pere Pujolàs ("9 ideas claves. El aprendizaje cooperativo", Graó argitaletxea 2008)
- David Durán ("Aprenseñar", Narcea argitaletxea, 2014).
Ikasgelako baliabideei buruz:
- UAB
- Ártica ikastetxeko Francisco Zariquiey; Cinética kolektiboko kide ere bada. Cinética kolektiboaren baliabideak.

Trebetasun emozionalak eta sozialak

Lantalde bakoitzeko kideek beren interakzioak, harremanak eta emozioak kudeatzen ikas dezakete, irakasleen esku-hartze didaktikoaren laguntzaz. Esku-hartze didaktikoa zuzenean edo teknika hauen bidez egin daiteke:

«9 ideas clave. El aprendizaje cooperativo» liburuaren A eremurako jarduerak (talde-kohesioa).

EDIA proiektuaren Hezkuntza Baliabide Irekia "Klas, klas, emozioak eszenara!".

Adimen anizkoitzak

«Inteligencias múltiples y TIC». Nuria Alart.

Pentsamendu errutinak

"Aprender y enseñar a pensar". Carmen Gonzálezen aurkezpena; funtsezko ideiak laburtzen ditu modu entretenigarrian.
Herramientas para aprender a aprender. Ikasgelan planifikatzen eta hausnartzen ikasteko jarduerak eta teknikak (Ana Basterra Cossio).
Guía EduSapiens. Escuela Creativas, Fundación Telefónica. Rutinas y destrezas de pensamiento: 68. orrialdetik 119.era. Otras herramientas para pensar: 120. orrialdetik 131.era.