Gizakiak bere existentziaren aztarnak utzi ditu Historiaurretik. «Aztarna» horiei behatuta eta haiek aztertuta, gizakien bizimodura eta pentsamoldera, hots, haien «historietara», hurbiltzea izango dugu, eta, horrela, hobeto ulertuko dugu geure historia.
Honezkero, ziur ohartuko ginela zer-nolako herentzia utzi zuten erromatarrek Europan. Mila urteko inperioaren ondoren, denok dugu haiengandik hartutako zerbait. Gainera, haien zibilizazioaren ebidentzia fisikoak daude leku askotan. Ezagutzen al dugu gure hiri edo herritik gertu dagoen erromatarren garaiko aztarnarik? Akueduktu bat bisitatu edo galtzada erromatar bat zapaldu al dugu inoiz?
Sinestezina dirudi milaka urteren ondoren oraindik ere eraiki zituzten eraikuntzak gozatu ahal izateak! Zibilizazio erromatarra duela mende asko desagertu bazen ere, zibilizazio horrek —hirigintzan eta hizkuntzetan bereziki— izan zuen presentzia eta eragina gogorarazten dizkiguten zenbait aztarna aurkitu ditzakegu oraindik ere.
Sekuentziaren azken zati honetan, erromatarren garaiko arkitekturari eta hizkuntzari buruzko probak egingo ditugu. Proba horiek eginda, amaitutzat joko dugu edukia, eta joko-taula prestatzeari ekingo dugu. Dagoeneko imajina dezakegu nolakoa izan daitekeen, hau da, zer forma izango duen? Zehazki, hauxe egingo dugu gure proiektuaren atal honetan:
- Erromatarren garaiko arkitekturako eraikinak ikertuko ditugu.
- Latinismoekin eta zenbaki erromatarrekin jolastuko gara.
- Sarrera bat idatziko dugu blogean.
- Gure jokoaren laukiak egingo ditugu: ezagutza-, trebetasun- eta sari-laukiak.