Material askeak aurkitzea
Badakigu zer material erabil dezakegun eta zer baldintzatan. Agerian geratu da ikasgelan edo gure hezkuntza baliabideak sortzeko garaian material libreak (irudiak, bideoak edo sekuentzia didaktikoak) erabiltzeko aukerak sustatu egiten duela edukiak zilegi den eran erabiltzeko joera; era berean, agerian geratu da, halaber, egile eskubideak errespetatzen dituela eta baliabideak guztion mesedetan eskura izatea sustatzen duela. Hala ere, lizentzia irekiak dituzten material horiek aurkitzea izan daiteke gainditu beharreko arazoetako bat.
Atal honetan hainbat orrialde eta zerbitzu eskaintzen ditugu; bertan ageri dira bai irudi edo bideoak, bai sekuentzia didaktiko oso aske eta doakoak, bere horretan erabiltzeko nahiz norberaren materialetan txertatzeko.
Nolanahi ere, gogorarazi nahi dugu ezinbestekoa dela egiaztatzea txertatzen ditugun materialen lizentzia eta sortzen ari garen baliabidearena bateragarriak direla.
Bilatzaile orokorrak
Bilatzaile orokorrek hainbat tresna eskaintzen dituzte eduki libreak bilatzeko.
- Google. Bilatzailea konfigura dezakegu Creative Commons lizentzia duten emaitzak eskain diezazkigun. Horretarako, "Ezarpen bizkorrak" aukera erabiliko dugu (bilaketa barraren eskuinaldean); Bilaketa aurreratua hautatuko dugu eta, azken eremuan (Erabilera eskubideak eremuan), aukeratuko dugu emaitzak zer erabilera-eskubide izatea nahi dugun.
- Bing. Bilatzaile honen bitartez, lizentziaren arabera filtratu dezakegu irudien bilaketa soilik.
- Yahoo. Kasu honetan, lizentziaren araberako filtroa irudien bilaketan soilik aplikatzen da.
Bilatzaile espezifikoak
Bilatzaile espezifikoetan ere aurki ditzakegu material askeak, hala nola honako hauetan:
- Wikipedia. Lankidetzan oinarrituta editatzen den entziklopedia askea da. Edukiak CC BY-SA lizentzia dauka.
- Wikimedia Commons. Jabari publikoko eta GNU, CC BY edo CC BY-SA lizentziak dituzten multimedia fitxategien biltegia da.
- Creative Commons Search. Materialak bilatzeko plataforma (irudiak, bideoak, 3D ereduak, musika...). CC lizentziak dituztenak bilatzen ditu, hainbat bilatzailetan.
- Procomún. Hezkuntza baliabide irekien gordailu ofiziala eta sare soziala da (INTEF - Hezkuntza eta Lanbide Heziketa Ministerioa). Unibertsitate aurretiko irakaskuntzetan erabiltzeko hezkuntza materialak, Creative Commons lizentzia dutenak.
Gainera, Espainiako Liburutegi Nazionalaren Jabari publikoko egileei buruzko informazio zerbitzuan, adibidez, jabari publikora igaro diren obrak dituzten egile espainiarrak kontsulta daitezke.
HBIak sortzeko proiektu instituzionalak
Jarraian adierazita dauden HBIak sortzeko proiektuek argitaratutako sekuentzia didaktikoak eXeLearning bidez sortuak dira. Software askeko egile tresna bat da eXeLearning, doakoa, eta baliabideen zatiak edo baliabide osoak berrerabiltzeko, moldatzeko, nahasteko eta banatzeko aukera errazten du.
EDIA proiektua - Cedec
EDIA proiektua, Cedec. Ikasgelan eraldaketa metodologikoa eta digitala bultzatzeko proposamen didaktikoen bankua da. Sekuentzia didaktiko horiek Haur Hezkuntza, Lehen Hezkuntza, Bigarren Hezkuntza eta Lankide Heziketan erabiltzera bideratuta daude, eta hauek dituzte ezaugarri nagusi: metodologia aktiboak barne hartzen dituzte, gaitasun eta edukiak garatzen dituzte, prestakuntzako ebaluazioa egiteko proposamenak txertatzen dituzte eta ikasgelan garatzeko beharrezkoak diren material guztiak barne hartzen dituzte. Aldi berean, material guztiak (ebaluazio errubrikak, txantiloiak, gidak…) Cedecen Errubrika eta bestelako dokumentuen bankuan daude eskuragarri, sailkatuta eta editatzeko moduko formatuan (LibreOffice) zein PDF formatuan deskargatzeko moduan. CC BY-SA lizentzia.
Ibilbide didaktikoak - INTEF
Ibilbide didaktikoak - INTEF. Ibilbide didaktikoetan multzokatuta aurkezten diren baliabideen bankua. Horrela, irakasleek agertoki osoa erabil dezakete edo baliabideak modu independentean erabil ditzakete, beren lehentasunen eta/edo beharren arabera. Baliabideek, gainerakoan, egitura bera dute, eta eduki teorikoak eta tipologia desberdineko jarduerak barne hartzen dituzte (finkatzeko jarduerak, lankidetzakoak eta sormenezkoak, ludikoak, etab.), irakaskuntza-ikaskuntza prozesuaren une desberdinei eta ikasleen aniztasunari erantzuteko.
CREA proiektua - Extremadurako Junta
CREA proiektua, Extremadurako Juntaren Hezkuntza eta Enplegu Kontseilaritzarena. Lehen eta Bigarren Hezkuntzarako hezkuntza baliabide irekien sorta da, ikasgelan ikaskuntza prozesu anitzei erantzutea helburu duena. Horretarako, metodologia aktiboak txertatzen dira era sistematikoan, ikaskuntzarako diseinu unibertsala txertatzen da eta ikasleen hezkuntza arloko arrakasta lortzeko lagungarriak izanen diren material eta baliabide osagarriak sortzen dira. CREA baliabideetan hainbat eremu eta mailatako irakasleen proposamen eta ekarpenak txertatzen dira; izan ere, horiek guztiek beren baliabideak partekatzen dituzte, hezkuntza komunitatearen eskura jarrita. CC BY-SA lizentzia.
Hezkuntza iraunkorra - Andaluziako Junta
Hezkuntza iraunkorrera bideratutako hezkuntza baliabideak eta edukiak, Andaluziako Juntako Hezkuntza eta Kirol Kontseilaritzarenak. Bigarren Hezkuntzan (HBH I. eta II. mailak), Batxilergoan, Hizkuntza Eskola Ofizialetan, Lanbide Heziketan eta Kirol Hezkuntzan erabiltzeko materialak dira. CC BY-NC-SA lizentzia.
Multimedia baliabideen bankuak
Jarraian eskaintzen ditugu gure baliabideetan txertatzeko multimedia baliabideen hainbat banku. Informazio hau Cedecen "Bancos gratuitos de imágenes, música, iconos, vídeos y sonidos" artikulutik atera da (CC BY-SA).
Ondoko lizentziak babestua Creative Commons: aitortu-PartekatuBerdin 4.0 Lizentzia