Egungo bizimoduaren eta produktu ultraprozesatuen eskaintzak gora egitearen ondorioz, nabarmen aldatu da gure elikadura. Gaur egun, produktu hiperkaloriko ugari kontsumitzen dira, azukre askokoak, eta nabarmen egin du behera fruta eta barazkien kontsumoak.
Gero eta urrunago gaude elikadura osasungarria esaten zaion horretatik. Bizitzaren etapa desberdinetan, pertsona bakoitzari behar dituen beharrizan nutrizionalak ematen dizkion elikagaiak barne hartzen dituena da elikadura osasungarria, hain zuzen ere. Datu batzuk:
- Espainiako biztanleen % 60k gehiegizko pisua du, eta kopuru horretatik % 20k, berriz, obesitatea.
- Haurrei dagokienez, 6 eta 10 urte arteko haurren % 45,5ak gehiegizko pisua du.
- Elikaduraren arloan gastatzen dugunaren % 30 soilik bideratzen da elikagai freskoak erostera. Gainerakoa elikagai prozesatuak erostera bideratzen dugu.
- Ohiko dieten ordez, gantz eta azukre kantitate handiagoko dietak ditugu orain (animalia-jatorriko gantza, bereziki); aldi berean, gero eta zuntz gutxiago kontsumitzen dugu.
- OMEren gomendioen arabera, egunean ez genuke 25 gramo azukre erantsi baino gehiago hartu behar. Espainian, 80 gramo inguru hartzen dugu, batez beste, egunean.
- Minbiziarekin zerikusia duten faktoreen % 31 elikadurarekin daude lotuta.
Homo obesus izango al gara? Ez, baldin eta elikadura orekatua zaintzea lortzen badugu. Horixe aztertuko dugu orain.