Atmosfera da Lurreko geruzen artean arinena eta kanpokoena. Zenbait gasen nahasteak osatzen du, propietate desberdinekin; orokorrean, airea deitzen zaio. Horrez gain, suspentsioko partikula solido eta likidoak ere baditu, adibidez polena, errauts bolkanikoak, errekuntza-hondakinak, ura, etab. Gasen kantitatea eta konposizioa aldatu egiten dira altueraren arabera.
Besteak beste, gas hauek osatzen dute atmosfera: nitrogenoa (% 78,08), oxigenoa (% 20,94), ur-lurruna (% 1 eta % 4 artean lurrazalean) eta argona (% 0,93), eta, kantitate txikietan, karbono dioxidoa (% 0,04), neoia (% 0,0018), helioa (% 0,0005) eta metanoa (% 0,0001).
Airea ez dago modu uniformean banatuta atmosfera osoan; izan ere, lurrazaletik gertu dago kontzentratuta, grabitatearen indarrak konprimituta, eta dentsitatea azkar murrizten da altitudea handitu ahala. Beraz, lurrazaletik gertuen dauden 5,5 kilometroetan dago aire-masa osoaren erdia, eta 15 kilometroen azpitik dago materia atmosferiko osoaren % 95. Gas-nahaste hori gabe, bizitza ezinezkoa izango litzateke.
Bizitzarako horren garrantzitsuak diren atmosferako gasak ikertuko ditugu.