Orain arte, “lurreko materialak” aipatu ditugu. “Material geologikoei” buruz pentsatzean, zer da irudikatzen dugun lehena? Mendi bat? Harri bat? Hala ez dirudien arren, material horiez inguratuta gaude, eta uste dugun baino gertuago daude. Kaleetan, eraikinetan, paisaian eta gure etxean topa ditzakegu.
Material horiek elementu eta konposatu kimikoak dira, eta egiturak osatzeko antolatzen dira. Mineral bat konposizio kimiko eta egitura jakinak dituen material bat da.
Mineralak, salbuespen batzuekin, ez daude isolatuta; izan ere, prozesu geologikoen ondorioz, egitura konplexuagotan taldekatzen dira, arroka izenekoak. Arrokak mineralez osatuta daude. Batzuk mineral bakar batez eta izaki bizidunen hondarrez osatuta daude. Arrokak, kimikako atomoaren eta biologiako zelularen moduan, geologiako oinarrizko azterketa-unitatea dira; izan ere, horien eraketa ikertzeak lurraren historiari buruzko informazioa ematen du.
Material geologikoak askotarikoak dira (5.600 mineral desberdin inguru daude), eta, izaki bizidunen moduan, irizpide zientifikoekin sailkatu behar ditugu bereizi eta ezagutu ahal izateko. Mineralak propietate kimiko eta fisikoen arabera sailkatzen dira. Arrokak, aldiz, eratzeko prozesu geologikoaren arabera.
Ataza honetan, gure inguruko materia harritsua ikusiko dugu. Ondoren, laborategira joango gara, gure inguruko arroka ezagun eta ohikoenetako batzuk osatzen dituzten mineralak ikertzera. Aukera baliatuko dugu, halaber, zientziari buruz apur bat “filosofatzeko”.