Saltatu nabigazioa

Hitzaurrea eta ikaskuntza-ibilbidea

Ibilbidea

Nola erabili

Material didaktiko honetan zenbait ikerketa-jarduera aurkezten dira, STEM konpetentzia garatzeko: horretarako, DBHko 1. mailako Biologia eta Geologia arloko oinarrizko jakintzak landuko dira, trebetasun zientifikoekin, geosferarekin, mineralekin, arrokekin eta geodibertsitatearekin lotuta.

Ez da ohiko unitate didaktiko edo proiektu bat, baizik eta askotariko ikasketa‑egoeren  proposamen-didaktiko multzo bat, erronka txikien gisa aurkeztuak, zenbait saiotan lantzeko. Erronka horien erreferentzia arakatzean oinarritutako ikaskuntza (inquiry based learning) da eta pizgarri eta desafio bat izango dira ikaslearentzat, bere ingurunearekin lotutako egoera esanguratsu bat ebazteko inplikatu beharko baita. Hori guztia jarduera gidatuen bidez egingo da, eta, azkenean, ariketa bat egingo da ikerketaren ondorioekin.

Koloretako harkoskoak
pxhere. Koloretako harkoskoak (Jabari publikoa)

Erronka horiek hezkuntza-gaitasunak garatzen dituzte, curriculumeko edukiak testuinguruan kokatuz. Irakasleentzat lagungarriak izan daitezke, gelarako ideiak izateko nahiz zuzenean erabiltzeko. Irakaslea da erabakitzen duena, banaka erabil baitaitezke, gaiaren garapenaren une desberdinetan, edo bertako oinarrizko jakintza guztiak hartzen dituen ibilbide batean tarteka daitezke, ikaskuntza-egoera konplexuagoan. 

Oro har, elementu hauek agertzen dira guztietan:

Ikaskuntza-egoera planteatzea

Proposamen bakoitzaren hasieran egoera bat planteatzen da; sarrera erakargarri baten bidez iker daiteke, ikasleentzat gertukoa eta gaiaren interesa islatzen duen gai batean zehaztua.

Erronkaren garapena

Hortik ikerketa hasten da, non ikasleek zenbait jarduera eta zeregin egiten baitituzte eta STEM gaitasuna garatzen baitute. Hipotesiak planteatzen dituzte, esperimentuak egiten dituzte, informazioa eta emaitzak biltzen dituzte, antolatu egiten dituzte, ondorioak lortzen dituzte eta ekoizpen desberdinen bidez jakinarazten dituzte.  Ikerketa horretarako abileziak behar dira eta gainerako oinarrizko gaitasunen garapena ere bai; ikaskuntzaren erdigunean ikaslea egoten da.

Ekoizpenak eta partekatzea

Ikerketa amaitzeko, ikasleek ekoitzi egin behar dute, eta ekoitzitakoa komunikatu eta hedatu ere bai. Komenigarria da erronka bakoitzean taldeek egindako ekoizpenek formatu desberdinak izatea (posterrak, idazlanak, multimedia...), gelan komunikatzea eta eztabaidatzea, eta, jarraian, partekatzea eta gero hedatzea.

Ebaluazioa

Erronken banako erabilera errazteko, ebaluatzeko irizpideak eta tresnak ditu bakoitzak, baina unitate didaktiko batean lotuta erabiliz gero, kontuan izan behar da ebaluazioak jarraitua eta prestatzailea izan behar duela prozesu osoan. Horretarako, irizpide eta tresna egokiak aukeratu behar dira eta ikasleei jakinarazi behar zaizkie, ikaskuntzan lortu beharreko helburuez ohar daitezen. Eskala malguak proposatzen dira, irakasleak edo ikasleak berak erabili ahal izateko prestakuntza-ebaluazioko prozesuan eta feedback/feedforward-ean (autoebaluazioa, koebaluazioa).

Ikasleek ikerketa-koaderno bat edo portfolio bat izan beharko dute, eta formatu digitala izatea gomendatzen dugu.

Portfolio hori ikerketa erregistratzeko eta prozesua dokumentatzeko erabiliko da. Portfolio horretan jasoko dira ikerketa-datu guztiak, egondako gorabeherak eta ikaskuntzari buruzko hausnarketak. 

Hausnarketa eta autoerregulazioa errazteko, autoebaluazioa eta koebaluazioa erabil daitezke, eta ikaskuntza-eguneroko bat ere bai, metakognizio-prozesua abian jartzeko. Proposatutako egunerokoak oinarrizko galderak izango ditu, baina galdera osagarriak ere egin daitezke, esaterako: Eskatu didatena lortzen ari naiz? Lortuko dut amaitzea? Gehiago ahalegindu behar dut? Nire planari eutsiko diot edo aldatu egingo dut? Zer egin behar nuen eta zer egin dut? Ondo noa denboraz? Huts egin dut: zer egingo dut? Zer ikasi dut horri esker? Nork lagun diezadake?

Creado con eXeLearning (Ventana nueva)