Erlezainek azken hamarkadetan erle-kolonietan izandako galeren ondorioz, arazo askoz ere globalago bat detektatu da: biodibertsitatearen galera eta horrek dituen ondorioak.
Gai mediatikoa izan da, hartz zurien habitata galtzearekin eta baleak neurrigabekeriaz arrantzatzearekin lotutako gaiekin batera; hala ere, ukaezina da hein handi batean kontsumoaren gizarteari lotutako arrazoiengatik mehatxatuta dauden espezie ugari daudela. Milioi bat landare- eta animalia-espezie inguru gaur egun galzorian daude, gizakiaren historiako kopururik handiena.
Polinizatzaileen beherakada kasu kezkagarrienen artean dago. Polinizatzaileen kopuruak behera egiten badu, horrek esan nahi du landare ugari ere desagertzeko arriskuan daudela, haien menpe dauden organismoekin batera. Halaber, polinizatzaileen kopuruak eta dibertsitateak behera egiteak eragina du elikagaien segurtasunean, eta nekazaritza‑errendimenduaren galera eragin dezake.
Ataza honetan polinizatzaileen, eta, zehazki, erleen arazoa ikertuko dugu, baina lan handia egiten duten beste izaki bizidun batzuk ere badaude: liztorrak, inurriak, euliak, tximeletak, kakalardoak, kolibriak, saguzarrak, karraskari batzuk, baita gizakia ere.